Greinasafn fyrir merki: bakstur

Muffins með smælkinu

Birt þann af
Svara
Banana- og bláberjamuffins

Banana- og bláberjamuffins

Í morgun heyrði ég fram í þvottahús að Árni Heiðar sagði í spurnartón við afa sinn: Kex? Afi hans svaraði eins og öfum ber: Já, fáðu þér kex. Ég heyrði svo að kexskúffan opnaðist og að gramsað var í henni. Stuttu seinna heyrði ég afa segja: Nei, ekki þetta. Þetta er ekki kex, þetta er Prins póló.

Svo hér verði nú ekki bara borðað sætt kex og annað sem smælkið velur sjálft úr skúffum og skápum um helgina (þá var Karen Sif líka komin og von var á Freyju Ösp), ákvað ég að baka muffins sem þykja í hollari kantinum. Það er líka mesta skemmtun fyrir smælkið að fá að baka á Þeló.

5 msk smjör eða kókosolía (við notuðum kókosolíu)

1/4 b hrásykur

1 stórt egg

1/2 b mjólk

2 1/2 b fínt spelt

1 tsk lyftiduft

2 vel þroskaðir bananar, stappaðir

1 b bláber (við áttum bara frosin, smælkið hafði úðað öllum nýtíndu berjunum í sig í morgunkaffinu)

Ofninn er hitaður í 200° C. Hræra saman kókosolíu og hrásykri þar til það er létt. Við settum þetta í hrærivélina og skiptumst á að setja hana í gang og slökkva á henni. Svo var egginu bætt við og síðan mjólkinni, mjölinu og lyftiduftinu. Að lokum er stöppuðum bönönum hrært saman við og síðast blárberjunum. Það er ágætt að miða við að hræra ekki mikið í deiginu eftir að mjölið er komið í og alls ekki mikið eftir að bláberin hafa verið sett í deigið.

Svo skipti smælkið á milli sín að raða formum á plötu og við settum deig með teskeiðum í formin. Það borgar sig að spara ekki deigið í hvert form. Kökurnar eru bakaðar í 20-25 mínútur.

Þetta smakkaðist vel og hefði smakkast betur ef við hefðum sett örlítið af salti útí deigið. Þess þarf sennilega ekki ef maður notar smjör.

Hitt bananabrauðið

Birt þann af
Svara

Image

Fyrr á árinu setti ég inn uppskrift að bananabrauði sem ég baka mjög oft. Í þessari færslu er svo uppskrift að bananabrauði sem ég geri sjaldnar. Það má segja að þetta sé hálfgert sparibrauð því það er aðeins meira maus við þetta brauð og svo er það líka sætara en hitt. Í dag var það bakað í tilefni af verslunarmannahelginni og í von um að hægt verði að narta í gæðabrauð úti á palli um helgina.

Þessa uppskrift tók ég uppúr Skíðablaðinu sem gefið er út fyrir vestan um hverja páska. Ég held að þetta hafi verið í blaðinu fyrir tveimur árum og þar heitir það Banana- og engiferbrauð.

275 g spelti (ég blanda grófu og fínu eða læt fínt spelti og íslenskt byggmjöl)

2 tsk vínsteinslyftiduft

1 msk fersk engifer, saxað smátt

3 tsk engiferduft

1 tsk kanill

0,5 tsk múskat

0,25 tsk negull

80 g hrásykur (ég set aldrei nema helminginn af þessu)

2 egg

4 mjög vel þroskaðir bananar

1 tsk vanilludropar

1 msk kókosolía (eða önnur góð olía)

115 g rúsínur

Aðferð

  • Sigtið saman í stóra skál spelti, vínsteinslyftiduft, engiferduftið, kanil, negul og múskat. Hrærið mjög vel.
  • Afhýðið engiferið og saxið (eða rífið) mjög smátt. Þið þurfið eina matskeið af engiferi. Setjið útí stóru skálina og hrærið vel.
  • Afhýðið bananana og stappið vel. Setjið í aðra skál ásamt vanilludropum, hrásykri, olíu og eggjum. Hrærið mjög vel.
  • Hellið bananablöndunni út í stóru skálina og veltið deiginu aðeins til. Ekki hræra mikið því þá verður brauðið seigt.
  • Bætið rúsínum út í deigið og veltið því varlega.
  • Deigið á að vera frekar blautt (á að leka af sleifinni í stórum klessum) og ef það er of þurrt bætið þá svolitlu vatni, mjólk eða appelsínusafa út í.
  • Klæðið brauðformið með bökunarpappír (eða notið yndislega sílikonformið) og hellið deiginu út í. Gætið þess að fari vel í hornin.
  • Bakið við 180°C í 45-50 mín. Stingið í brauðið og þegar prjónninn kemur þurr úr brauðinu er það tilbúið.
  • Kælið brauðið aðeins og skerið í sneiðar.
  • Gott með osti og smjöri.

Hitt hrökkbrauðið

Birt þann af
Svara
Gerlaust hrökkbrauð

Gerlaust hrökkbrauð

„Hitt“ hrökkbrauðið sem ég baka reglulega geri ég eftir uppskrift úr Gestgjafanum og þar heitir það Gerlaust hrökkbrauð:

50 g sólblómafræ

3 msk hörfræ

50 g sesamfræ

230 g heilhveiti

1 tsk salt

1 3/4 dl volgt vatn

1 1/2 msk hunang

2 msk olía

Hitið ofninn í 200°C. Malið sólblómafræ og hörfræ lítillega í matvinnsluvél. Blandið fræjunum, heilhveiti og salti saman í skál. Bætið vatni hunangi og olíu út í og hnoðið deigið í 5 mín (ég nota hrærivélina og set á hana hnoðarann). Skiptið deiginu í tvenn og fletjið það í 2 ferkantaðar kökur. Setjið kökurnar á bökurpappír á bökunarplötur og skiptið í bita með pizza-skera (ég nota kleinujárn og sker kökurnar á borðinu og raða þeim á bökunarplötuna). Þið getið líka skipt deiginu í 10 kökur og flatt það þunnt út í kringlóttar kökur; stingið gat úr miðju ef þið viljið. Bakið í (+) 10 mín. Kælið vel. Geymist vel í boxi. Má frysta.

Ég hef hnoðað kúmen saman við helminginn af kökunum og stundum stungið litlar kökur úr deiginu með kökuformum og strái Reykjanessalti yfir þær. Þær kökur/kex er hægt að bera fram með ostum í staðinn fyrir Ritz-kex eða annað „ostakex“.