Við verðum að gera þetta saman: Samvinna um læsi

Auður Björgvinsdóttir

Gestur Hlaðvarps Bara byrja er að þessu sinni Auður Björgvinsdóttir sem um árabil hefur verið kennari við Álftanesskóla. Hún segir frá áhugaverðu verkefni sem hún, ásamt kennurum við skólann hafa unnið að í nokkur ár og miðar að því að fræða foreldra barna í fyrsta og þriðja bekk um lestrarkennslu og lestrarþjálfun með það að markmiði að auka þátttöku þeirra í lestrarnámi barnanna. Verkefnið varð svo rannsóknarefni hennar í meistaraverkefni hennar sem hún lauk frá Háskólanum á Akureyri árið 2017. Hérna er hægt að glugga í verkefnið hennar.

Í þættinum segir Auður okkur frá því hvernig verkefni sem einn skóli fóstraði og þróaði varð að rannsóknarefni og verður svo aðgengilegt öllum skólum til að bæta við eigin foreldrafræðslu um lestrarkennslu og þjálfun, sama hvaða lestrarkennsluaðferð skólinn styðst við. Hérna er hægt að nálgst það á Lestrarvef Menntamálastofnunar. Svo segir Auður okkur líka frá því hvað hún ætlar næst að taka sér fyrir hendur.

Hlusta á Spotify eða Apple Podcast.

Kennsla er jú mikilvægasta starfið

Ingvi Hrannar Ómarsson. Mynd fengin af vef Feykis

Í þessum þætti hlaðvarps Bara byrja spjalla ég við í Ingva Hrannari Ómarssyni kennara, kennsluráðgjaf og frumkvöðli með meiru segja frá því af hverju hann varð kennari, framhaldsnáminu í Stanford, mögulegum áhrifum Covid19 á skólastarf, verkefnum sumarsins, nýja starfinu hans og auðvitað bar Utís 2021 á góma.

Það er alltaf hvetjandi og skemmtilegt að hlusta á Ingva Hrannar segja frá verkefnum sínum og pælingum.

Ef þú fylgir Ingva Hrannari ekki á Twitter mæli ég með því að þú gerir það.

Hlusta á Spotify eða Apple Podcasts

Leiðsagnarnám og lifandi netkennslustundir

Halldór Björgvin Ívarsson í viðtali við blaðamann Kjarnans. Myndin er fengin að láni úr viðtalinu sem birtist í Kjarnanum í maí 2020.

Í lok nóvember sl. hlustaði ég á kynningu hjá Halldóri Björgvin Ívarssyni kennara við Framhaldsskólann í Mosfellsbæ. Þar sagði hann frá því hvernig hann nálgast leiðsagnarnám og hvernig honum tókst að færa það skipulag og áherslur yfir í netkennslu.

Af kynningu Halldórs Björgvins var ljóst að hann hafði ástríðu fyrir því að kennslan vekti áhuga nemenda og hann lagði sig fram um að finna leiðir til að virkja nemendur þannig að þeir hafi áhrif á eigið nám ásamt því að gefa þeim tækifæri til þess að eiga hlutdeild í því hvernig verkefni þeirra eru metin. Eftir kynninguna hafði ég samband við Halldór Björgvin til að fá hann í viðtal í Hlaðvarp Bara byrja. Hann varð við bóninni og hérna fyrir neðan getur þú hlustað á viðtalið við hann og kennslu-kisuna Töru. Þar segir hann frá verkfærunum sem hann notar og skipulaginu sem hann styðst við; m.a. skammtaaðferðinni og nálgun hans á leiðsagnarnámið.

Hlusta á Spotify eða Apple Podcasts.