Heklaðir grænmetis- og ávaxtapokar

IMG_6746

Á ferðalögum, úti á palli, við sjónvarpið eða hvar sem er, þar sem ég get unnið handavinnu sem krefst ekki fullrar athygli finnst mér gaman að hekla. Það nýjasta eru pokar sem hægt er að taka með sér í búðina og setja ávextina eða grænmetið í en auðvitað ekki fyrr en búið er að vigta innkaupin svo við greiðum ekki fyrir vigtina á pokunum í hvert sinn sem við förum í búðina.

Ég sá þessa poka hjá frænku minni og vinkonur mínar hafa svo séð þá og langað að hekla aðra eins poka. Eftir bestu getu hef ég skráð hvernig ég hef útfært þessa hugmynd. Ef þú vilt fá aðgang að þeirri skráningu hafðu þá samband við mig til að fá lykilorð inn á skráninguna.

Krakkakúrur

img_7752

Horft og kúrt á rigningadegi sumarið 2015

Fyrir um það bil tveimur árum gaf tengdamóðir mín mér afganga af bómullargarni sem hún gat ekki notað og við héldum að ég gæti notað það í klúta- eða tuskuhekl. Seinna kom í ljós að svo var ekki, þannig að ég ákvað að hekla dúkkuteppi fyrir ömmustelpurnar. Úr varð að ég heklaði teppi sem er ögn stærra en ungbarnateppi (120 cm x 80 cm) og ég kallaði krakkakúru; þ.e.a.s. teppi fyrir krakka til að kúra undir. Í teppið fóru líka aðrir garnafgangar sem ég tíndi til úr öllu skúffum og skápum. Það er mesta furða hvað hefur safnast mikið upp af garni í húsinu. En úr þessu safni varð hið besta teppi sem krakkar kúra undir og láta sér líða vel eða nota það til að leika sér.

 

Þó fyrsta krakkakúran væri komin í notkun var ennþá nóg til af garni og mér sýndist ég geta gert aðra. Ég byrjaði á annarri krakkakúru í jólaleyfinu 2015. Þetta var verkefni sem ég greip af og til í og vann með annarri handavinnu árið 2016. Ég vann í því þegar ég tyllti mér niður í stofunni og vantaði eitthvað til að hafa á milli handanna eða ég hafði ekkert annað að hekla eða prjóna.

Ég lenti að vísu í vandræðum þegar mér datt í hug að setja ömmudúllur í miðjuna og þurfti að hugsa framhaldið uppá nýtt. Það fór svo að ég þurfti að „byrja á endanum“ og hekla þann hluta svo við dúllurnar í miðjunni. Í þessu brasi komst ég næstum í fýlu út í verkefnið en dúllaði samt við það af og til. Í jólaleyfinu um daginn komst ég svo að því að lítið var eftir og að nú væri kannski hægt að nota tímann til að sættast við þessa krakkakúru og ljúka við hana.

Nú bíða tvær krakkakúrur í sófanum á Þelamörk eftir því að krakkar komi í heimsókn kúri undir þeim eða noti þær í leiki, úti eða inni. Og hver veit nema þriðja krakkakúran verði svo til á þessu ári?

img_1925

Enn er nóg til af garninu

 

 

 

Borðtuskuæðið

Borðtuskupakkar

Ekki þær fyrstu og ekki þær síðustu sem urðu til á ferð og flugi.

Í meira en eitt ár hef ég verið með heklunál og garndokku í veskinu svo ég geti gripið í borðtuskuhekl þegar færi gefst og ég sé að þannig er það hjá fleirum. Eiginlega má segja að borðtuskuæði hafi gripið um sig hjá þeim sem á annað borð byrja á þessu enda er auðvelt að smitast af þessari iðju. Til marks um þetta veit ég um tvo hópa á Facebook þar sem hægt er að skiptast á hugmyndum, sýna hvað er á prjónunum eða nálinni og fá leiðbeiningar og hrós. Annar hópurinn heitir Brjálaðar borðtuskur og hinn Borðtuskurnar okkar.

Það er ekki bara á Facebook sem hægt er að ná sér í uppskriftir. Á Pinterrest og víðar á netinu er hægt að verða sér úti um hugmyndir. Þar sem ég hef líka gaman að því að vafra á netinu rakst ég fyrr á þessu ári á uppskriftir að tuskum þar sem bara eru notaðir fastapinnar en á þrjá mismunandi vegu. Þar sem plögg úr pastapinnum eru fastari og þéttari í sér en þegar notað er annað hekl er betra að nota annað hvort grófari nál eða grófara garn en venjulega. Þegar ég prófaði þessa uppskrift valdi ég bæði ögn grófara garn og heklunál sem er hálfu númeri stærri en ég nota venjulega.

Á Akureyri er handavinnubúðin Quiltbúðin sem selur garn, efni og alls kyns áhöld og fylgihluti fyrir handavinnuna. Þar get ég alltaf fundið það sem mig vantar og ef það er ekki til í búðinni er þar alltaf hægt að fá hjálp við að finna annað sem kemur í staðinn. Þegar ég ákvað að prófa fastapinna-tuskurnar keypti ég þar sprengt akrylblandað bómullargarn sem heitir Belice og er frá Katia. Það er allt í lagi að þvo það á 60° en ég hef ekki prófað að sjóða það. Til að hekla fastahekl úr þessu garni notaði ég heklunál nr. 3,5.

Halda áfram að lesa

Sumargjafir

Á fimmtudaginn er sumardagurinn fyrsti og allt útlit fyrir að veðrið muni minna á vorið og sumarið.

Enn fagna skátarnir sumrinu með skátamessu í Hallgrímskirkju en ekki veit ég hvort það er líka ennþá gert á Ísafirði. Ég man eftir því að sem yrðlingur og skáti hafi ég ásamt öðrum krökkum á Ísafirði mætt í skrúðgöngu sem þrammaði í hvaða veðri sem var frá Skátaheimilinu að kirkjunni til að fagna komu sumarsins.

Þennan dag fengum við líka sumargjafir. Það var venjulega eitthvað sem minnti á sumarið; bolti, sippuband eða ný sumarföt.

Sumargjafir smælkisinsÉg ákvað fyrir páskana að gefa smælkinu ekki páskaegg, heldur að halda mig við að gefa þeim sumargjafir. Í ár voru þær flestar heimagerðar. Kallavettlingar sem mamma prjónaði fyrir Freyju Ösp og hún heklaði líka Hello Kitty tösku fyrir Karen Sif. Á meðan heklaði ég smekki fyrir litla Hjörvar Húna sem er þriggja mánaða í dag. Árni Heiðar fær almennileg sundgleraugu fyrir börn svo hann geti kafað án þess að gleraugun fyllist af vatni.

Sjálf fékk ég mér nýjan hlaupajakka.

Gleðilegt sumar.

Áskorun á aðra heklara

Múrsteinninn

Múrsteinninn

Í gær sagðist ég hafa lokið við að hekla stuðningskrukkurnar. Þó að svo sé, er ekki þar með sagt að verkefninu geti verið lokið.

Til að verkefnið geti átt sér framhaldslíf þá set ég hérna inn á bloggið eina uppskrift að  stuðningskrukku. Þessa uppskrift skráði ég fyrr í vetur til að geta sagt konum (enginn karl beðið um það ennþá) til við krukkuhekl.

Þeir sem vilja spreyta sig á krukkuheklinu geta því smellt hérna og fengið sér uppskrift að krukkuhekli. Þeir sem nýta sér uppskriftina geta valið um:

  1. að hekla stuðningskrukku og komið henni svo til einhvers sem greiðir fyrir hana inn á styrktarreikning Elsu
  2. eða að þeir greiða sjálfir inn á styrktarreikninginn um leið og þeir ná sér í uppskriftina.

Gangi ykkur vel og góða skemmtun.

Styrktarreikningur Elsu er:  556-14-402989 kt. 171066-2989

Verkefninu er lokið svo öllum er heimilt að nýta sér uppskriftina.

Hetjan

20140321-094840.jpg

Í ljósi nýjasta viðtals BB við Elsu er við hæfi að síðasta krukkan í þessu verkefni sé kölluð Hetjan.

Þetta verkefni hefur verið skemmtilegt og það er skrýtið að segja að því sé lokið. Margir hafa haft samband við mig og það hefur verið auðvelt finna krukkunum eigendur. Einnig hefur fólk gaukað að mér bæði garni og krukkum. Það segir meira um Elsu, viðmót hennar og tengslanet en sjálft verkefnið.

Ég mun áfram fylgjast með hetjunni Elsu og hvernig hún af undraverðu æðruleysi og bjartsýni tekst á við veikindi sín og bata.

Hetjan hefur þegar fengið eiganda.

Hérna fyrir neðan eru myndir af öllum krukkum verkefnisins,

This slideshow requires JavaScript.