Lesið fyrir ömmu á Flipgrid

Af reynslunni, bæði sem kennari og móðir, veit ég að það getur verið erfitt að koma heimalestri fyrir svo hann verði að yndisstund bæði fyrir þann sem hlustar og þann sem les. Ég á barnabörn sem ekki búa í nálægð við mig. Tvö þeirra eru byrjuð í skóla og eru því með heimalestur. Þau ganga í sitt hvorn skólann og fyrir ömmu sem hefur áhuga á kennslu og skipulagi hennar hef ég gaman af því að fylgjast með skipulaginu í skólunum í kringum þessi tvö og hvernig það hefur áhrif á áhuga þeirra og elju við lærdóminn.

lesid fyrir ommu

Árni Heiðar les á meðan amma fær sér skyr eftir æfingu.

Ég hef verið svo lánsöm að fá að fylgjast með heimalestrinum. Við höfum mikið notað myndsímtöl eins og Facetime. Þá hringja krakkarnir í mig og lesa fyrir mig og svo falsa þau undirskrift ömmu á kvittanablaðið í lestrardagbókinni.

Þessi leið er skemmtileg því að við erum í samskiptum á rauntíma og getum rætt um lesturinn og innihald textans jafnóðum og lesturinn fer fram. En þessi aðferð krefst þess að ég sé tiltæk þegar þau eru reiðubúin til að lesa og það er nú ekki alltaf þannig svo ég hef farið á mis við nokkur góð lestrartilboð. Ég fann þá út að við þyrftum að finna annað fyrirkomulag sem hentaði okkur betur.

Á menntabúðum #Eymennt hafði ég kynnst Flipgrid en skildi ekki fullkomlega hvernig það virkaði eða hver galdurinn væri eiginlega við það umfram það að taka bara upp myndbönd og senda sín á milli. En Flipgrid er miklu meira en það. Flipgrid er vefsvæði og líka smáforrit þar sem hægt er að taka upp stutt myndbönd um efni eða efnisþætti sem fjallað er um hverju sinni. Það sameinar kosti samfélagsmiðla við nám og kennslu. Það er áskorun fyrir kennarann að hugsa upp hvernig hann setur efnið fram á skipulegan hátt þannig að auðvelt sé fyrir nemendur að rata um Flipgrid-ið og líka einfalt fyrir kennarann sjálfan í úrvinnslu. Hægt er að stilla verkefni og skilum nemenda þannig að nemendur geti svarað hver öðrum og gefið hver öðrum endurgjafir eða spurt spurninga.

flipgrid

Flipgrid hefur ótal möguleika sem sjást ekki við fyrstu sýn.

Til að kynnast Flipgrid betur prófaði ég að nota það til að skila ígrundunardagbókum í námi mínu við HA eftir áramótin og deildi dagbókinni svo með kennaranum. Þar kynntist ég því hvernig það er að vera nemandi og bíða eftir myndbandi frá kennaranum með endurgjöf.

Svo prófaði ég að nota Flipgrid í heimilsifræðikennslu sem ég var með í vali með nemendum á elsta stigi seinni partinn í vetur. Ég notaði Flipgrid þegar ég þurfti að fara í burtu og nemendur sáu sjálfir um sig í tímanum. Þá fengu þeir skipulag tímans á Google Classrom, uppskriftirnar voru allar á Pinterest og verkefnaskilin fóru fram Flipgrid. Á Flipgrid sýndu nemendur mér afrakstur tímans og svöruðu spurningum um framvindu tímans á myndbandinu. Þegar ég hafði fengið svörin inn á Flipgrid-ið sá ég hversu auðvelt væri að nota myndböndin sem söfnuðust saman í námsmat. Þarna varð til á einu svæði sýnismappa af bæði afrakstri og framvindu hjá öllum nemendum.

Ég fór líka að fylgja Flipgrid eftir á Twitter og fylgjast með því hvernig aðrir kennarar nota það. Það var mjög lærdómsríkt. Ein hugmynd var t.d. að þegar skóla var aflýst vegna veðurs setti kennarinn upp Flipgrid-svæði þar sem nemendur settu inn myndbönd og sögðu frá því hvernig þeir vörðu deginum og önnur var um sumarlestur.

En þetta fannst mér það besta vegna þess að það sýnir svo vel töfrana sem Flipgrid hefur sem nemendur kunna að meta:

Fyrst var ég með ókeypis aðgang en á honum er bara hægt að setja upp eitt efni (grid) en setja í það ótal efnisþætti (topics) en til að geta gert meira en það og lengt myndböndin keypti ég mér aðgang  og stofnaði svæði um lestur barnabarnanna. Fyrst hafði ég hugmynd um að ég myndi búa til efni um hvern lestur og þau myndu svo hvort um sig setja inn lesturinn sinn. En við sáum strax að það var hamlandi fyrirkomulag því þá var lesturinn fyrir ömmu undir því kominn hvenær ég hafði náð að búa til nýtt svæði. Þannig að núna eiga þau hvort um sig svæði þar sem þau skila inn lestri þegar þeim hentar. Ég fæ tölvupóst sem segir mér að þau hafi sett inn myndband og þarf að bregðast fljótt við því þau eru svo dugleg að senda mér myndbönd.

 

This slideshow requires JavaScript.

Það sem Flipgrid hefur í þessu verkefni umfram myndsímtölin sem við höfðum áður prófað, er:

  • Karen Sif og Árni Heiðar geta lesið þegar þeim hentar og ég fæ skilaboð þegar þau eru búin að setja inn myndband.
  • Ég get hlustað á þau og gefið þeim hrós og leiðbeiningar þegar mér hentar. Ég sendi þeim svo skilaboð þegar ég er búin að setja inn mitt myndband. Karen Sif á síma og fær sms en Árni Heiðar fær skilaboð í gegnum mömmu sína.
  • Þau geta hlustað hvort á annað. Þannig verða fleiri þátttakendur í heimalestrinum og þetta verður sameiginlegt verkefni án þess að við séum öll að gera þetta á sama stað á rauntíma.
  • Ég get boðið afa hvenær sem er að hlusta og taka þátt í verkefninu með okkur.
  • Það verður auðvelt að bjóða Freyju Ösp í hópinn með því að búa til svæði fyrir hana þegar hún byrjar í 1. bekk í haust.
  • Við getum auðveldlega fylgst með framförum með því að skoða myndböndin.
  • Það myndast samfella í heimalestrinum af því við ræðum um innihaldið og ég set inn spurningar sem þau svara í næsta myndbandi. Það er mjög skemmtilegt.
  • Við getum skemmt okkur með límmiðunum.
karen

Karen Sif ánægð með bókina Ofurhetjuvíddina frá Ævari Þór

Karen Sif hefur farið mikið fram í lestrinum í vetur. Það er ekki bara þessu verkefni okkar að þakka heldur samstilltu átaki heimilis og skóla um æfingu og að viðhalda áhuga. Flipgrid verkefnið okkar var hluti af því síðara, að lesa með tilgangi. Þegar við pabbi hennar sögðum frá framförunum á Facebook þá tók Ævar Þór Benediktsson eftir því og til að hvetja hana enn frekar sendi hann henni áritaða bók með hrósi og hvatningu. Karen Sif segist ætla að lesa þá bók fyrir mig á Flipgrid í sumar.

Af þessu verkefni okkar hef ég lært að fjarlægðin er ekki hindrun heldur miklu frekar hafa hún og tæknin gefið okkur annars konar og betri nálgun á heimalesturinn en ef ég hefði verið í næsta húsi við börnin og þeim aðgengileg hvenær sem er.

Meira um Flipgrid

Kynningarmyndband um Flipgrid á YouTube.

Kennslumyndband um Flipgrid á YouTube.

Flipgrid virkar með Google Classroom hvernig það er gert er sýnt á þessu myndbandi á YouTube.

Gengið í Fossdal

Laugardaginn 9. júní 2018 gengum við Halldór í Fossdal með Ferðafélagi Akureyrar. Fararstjóri var Helga Guðnadóttir. Það voru um 30 manns í ferðinni. Ekið var að Kleifum í Ólafsfirði og gengið eftir kindastíg að vitanum og þar áð í dálitla stund. Sá spotti tók klukkustund. Síðan var gengið inn í Fossdalinn þar sem við fundum laut þar sem hópurinn snæddi nestið sitt. Því næst var gengið áleiðis að brú sem er yfir ána því hinum megin við ána er gestabók þar sem allir rituðu nöfn sín. Eftir það var gengið aðeins lengra inn í dalinn og svo haldið heim.

Alls tók gönguferðin rúmlega þrjá tíma. Enda var veðrið til þess fallið að njóta þess sem leiðin hefur upp á að bjóða.

Svo að við gætum safnað á einn stað myndunum úr ferðinni gerði ég auðvitað albúm í Google Photos sem ég deildi með Halldóri.  Myndirnar er hægt að skoða hérna.

Ævintýrin eru alls staðar

img_6510

Útsýnið þar sem við lögðum bílnum og teygðum eftir hlaup.

Það þarf ekki að leita langt yfir skammt til að finna sér ævintýri til að gera vanann skemmtilegri. Í fyrradag fórum við Halldór í okkar venjulega skokktúr. Það var hlýtt í veðri og sólin skein. Í stað þess að fara á Skottið eins og við gerum oftast þá fórum við aðeins lengra og hlupum á einni af uppáhaldsleiðunum okkar, gamla veginn út á Hjalteyri Galmaströndinni. Hann liggur neðan við Ólafsfjarðarveginn. Í þetta skiptið ókum við áleiðis að Hjalteyri og lögðum bílnum skammt frá gamla barnaskólann á Hjalteyri en venjulega leggjum við bílnum við hinn endann á þessum vegspotta. Þessi vegspotti er 6 km aðra leiðina og ég hef notað hann í skokk í meira en 10 ár því þarna er lítil umferð og rólegt og fallegt umhverfi.

Halda áfram að lesa

Á kvennaþingi II

34308594_10212071924529656_2049852624680779776_nÁ sunnudagskvöldinu eftir ferðina til Essasouria var hægt að skrá sig inn á ráðstefnuna og sækja gögn hennar. Þar fannst mér gaman að sjá að starfsfólk ráðstefnunnar var með spjaldtölvur þar sem við skráðum okkur inn. Umfram hefðbundnar aðferðir við innskráningu var þetta fljótleg aðferð sem notaði engan pappír. Þar fyrir utan fylgdi ráðstefnunni app þar sem ráðstefnugestir gátu haldið utan um dagskrá, glósur og annað sem skipti máli á ráðstefnunni auk þess sem þaðan var hægt að deila ljósmyndum og hugmyndum á samfélagsmiðla.

SI_3rd EI World Women's Conference Marrakesh

Halda áfram að lesa

Á kvennaþingi I

Um mánaðamótin janúar og febrúar fór ég ásamt fimm forystukonum innan KÍ á þriðja kvennaþing Alþjóðasamtaka kennara (EI) sem Kennarasamband Íslands er aðili að. Konurnar fimm eru Guðbjörg Ragnarsdóttir þáverandi varaformaður FG, Guðríður Arnardóttir formaður FF, Fjóla Þorvaldsdóttir þáverandi varaformaður FL, Hanna Björg Vilhjálmsdóttir forkona jafnréttisnefndar KÍ og Ingibjörg Kristleifsdóttir þáverandi formaður FSL.

Halda áfram að lesa

Tvær snjallar

Nýlega birtu tvær snjallar konur, Fjóla Þorvaldsdóttir og Helena Sigurðardóttir, meistaraverkefni sín á vefnum. Verkefnin eiga það sameiginlegt að fjalla um upplýsingatækni í skólastarfi. Annað þeirra er vefurinn Fikt eftir Fjólu og hinn er Snjallvefjan eftir Helenu.

Halda áfram að lesa