ESHA 2018 – kynning á #Eymennt

Í síðustu viku héldu evrópusamtök skólastjórnenda ráðstefnu í Tallinn í Eistlandi. Á ráðstefnunni voru nokkur aðalerindi sem öll fjölluðu um notkun tölvu og tækni í skólastarfi. Einnig var boðið upp á níu málstofur þar sem skólastjórnendur sögðu frá því hvað og hvernig tölvum og tækni væri nýtt í skólum þeirra.

Fjórir stjórnendur af þeim sex skólum sem standa að menntabúðum #Eymennt sóttu ráðstefnu og kynntu samvinnuverkefnið #Eymennt um menntabúðir fyrir kennara og aðra áhugasama um notkun upplýsingatækni í skólastarfi:

ESHA

Eftir kynninguna. Spurningum úr sal svarað.

 

 

Hrund Hlöðversdóttir skólastjóri Hrafnagilsskóla

Ingileif Ástvaldsdóttir skólastjóri Þelamerkurskóla

Katrín Fjóla Guðmundsdóttir deildarstjóri við Dalvíkurskóla

Kristín Jóhannesdóttir skólastjóri Oddeyrarskóla

 

 

 

Glærur kynningarinnar eru hérna fyrir neðan:

 

Einnig er hægt að horfa á kynninguna á myndbandi með því að smella hérna. Kynningin á #Eymennt byrjar þegar 1 klst. og fimm mínútur eru liðnar af myndbandinu.

Að taka þátt í þessu verkefni með stöllum mínum í #Eymennt var mjög lærdómsríkt. Við nýttum okkur Google umhverfið til að vinna saman að kynningunni, gerðum könnun meðal kennara í Google Forms, bjuggum til myndband í Adobe Sparks og IMovie ásamt því að standa á stóru sviði og kynna verkefnið á ensku.

Með góðri samvinnu er lítill vandi að sigrast á áskorunum eins og þessari.

 

Gerum gott betra

Úr kynnisferðinni til De Wijnberg

Ég skrifaði grein sem birtist í Skólaþráðum tímariti Samtaka áhugafólks um skólaþróun.

Greinin er um það hvernig skólaheimsókn varð að kynnisferð og síðan að Sprotasjóðsverkefninu Gerum gott betra.

Greinina er hægt að lesa hérna.

Útivera, framfarir og gleði

 

Myndbandið er gert í Google Photos appinu

1. Skíðaskóli Þelamerkurskóla

Undanfarna fjóra vetur hefur Þelamerkurskóli boðið nemendum í 1. – 4. bekk upp á skíðakennslu í Hlíðarfjalli, þeim að kostnaðarlausu. Um er að ræða kennslu í 90 mínútur í senn í þrjá til fjóra daga í röð. Um kennsluna sjá skíðakennarar úr Skíðaskóla Hlíðarfjalls en sveitarfélagið stendur straum af kostnaðinum.

Skíðaskóli Þelamerkurskóla er samstarfsverkefni Foreldrafélags Þelamerkurskóla og skólans. Fyrir verkefnið fékk skólinn Foreldraverðlaun Heimilis og skóla árið 2017-2018. Aðkoma foreldra að Skíðaskólanum er þannig að þeir aðstoða starfsmenn skólans við að taka á móti börnunum þegar þau koma í Hlíðarfjall og einnig áður en haldið er heim. Það er nokkuð verk að koma tæplega 30 börnum hratt og örugglega í skíðabúnaðinn til þess að sem mest verði úr tímanum í skíðabrekkunum.

Skíðaskóli ÞMS er eitt af verkefnum útiskóla Þelamerkurskóla. Útiskólanum er skipt í þrjú þemu. Þau eru, útiskóli sem hluti af námsgreinum, grenndarkennsla og hreyfing er afþreying. Innan hvers þema eru nokkur verkefni sem eru fastir liðir í starfi skólans.

Útivera, framfarir og gleði

Skíðaskóli ÞMS varð til vegna þess að starfsmenn Þelamerkurskóla höfðu tekið eftir því að þeim nemendum fækkaði á milli ára sem voru vanir því að fara á skíði. Það hafði í för með sér að þeir höfðu litla ánægju af árlegum skíðadegi skólans í Hlíðarfjalli. Skíðaskólanum er líka, eins og fleiri verkefnum í þemanu hreyfing er afþreying ætlað að kynna markvisst fyrir nemendum möguleika á að nýta sér hreyfingu sem afþreyingu.

Markmið Skíðaskóla ÞMS eru:

  • Að auka færni nemenda á skíðum svo þeir hafi meiri ánægju af árlegum skíðadegi skólans í Hlíðarfjalli,
  • Að í framtíðinni hafi fleiri nemendur möguleika á að stunda skíði sér til ánægju og heilsubótar.

Halda áfram að lesa

Sagt frá og miðlað með Clips

Það eru til mörg verkfæri fyrir snjalltæki til að skrá og miðla sögum og frásögnum. Eitt af þeim er smáforritið Clips. Í vikunni var ég á lokahátíð Stóru upplestrarkeppninnar. Sá viðburður er í sjálfu sér merkilegur í hvert sinn og vel þess virði að hann sé skráður og sögunni sé miðlað sem best og víðast. Ein leið til þess er að safna myndum og stuttum myndböndum og skeyta saman í smáforritinu Clips. Clips gefur nefnilega möguleika á að setja inn á endanlega myndbandið m.a. texta, tákn, að vinna með myndirnar og myndböndin og setja á myndirnar filtera. Það er líka hægt að setja tónlist við myndbandið bæði úr eigin safni og safni um það bil 70 titla sem fylgja forritinu. Clips er til fyrir Iphone og Ipada.

clips

Clips er til fyrir Iphone og Ipad

Á síðustu lokahátíð Upplestrarkeppninnar hafði ég gleymt að taka myndavél skólans með mér á hátíðina svo ég þurfti að nota símann minn til að taka myndirnar. Þegar ég ætlaði að fara að dæla þeim úr símanum inn á heimasíðu og  þaðan á Facebooksíðu skólans og skrá við hverja mynd nafn og skóla upplesaranna datt mér í hug að það væri kannski skemmtilegra að skoða nokk svo einhæft myndefni í litlu myndbandi þannig að ég setti myndirnar sem ég tók saman í Clips og til að lífga upp á myndbandið bætti ég við myndum með texta sem ég bjó til í smáforritinu Canva og setti í lokin inn tónlist úr tónlistarsafni forritsins.

Halda áfram að lesa

Finna eigin leið og samvinna

Um þessar mundir vinnur Reykjavíkurborg að því að gera sér menntastefnu til ársins 2030. Til þessa verks hefur borgin fengið til sín m.a. Pasi Sahlberg. Á dögunum komu hann og Andy Hargreaves til landsins og þeir voru meðal annars með fyrirlestra í Hörpunni. Viðburðinum var streymt á netinu og einnig er upptakan öllum aðgengileg.

Morgunsárið í dag notaði ég til að hlusta á þá félaga segja frá rannsóknum sínum og setja niðurstöður þeirra í samhengi við aðstæður víða í heiminum og það sem skiptir máli í skólastarfi.

Sem fyrr benti Pashi Sahlberg á að þrátt fyrir að útkoma okkar á Pisa sé ekki eins og við vildum hafa hana besta er margt sem vert er að efla enn frekar. Hann hvatti fundarmenn til að finna íslensku leiðina í menntakerfinu en ekki að apa upp leiðir annarra þjóða.

Halda áfram að lesa

Á hraðstefnumóti

keep-calm-and-speed-date-14

Í vetur hef ég tekið þátt í fjórum hraðstefnumótum. Þau hafa verið um öpp eða vefsvæði sem hafa gagnast í leik og starfi. Nú síðast á föstudaginn með kollegum mínum á fundi þar sem við ræddum m.a. mögulegar leiðir í eigin starfsþróun og annarra starfsmanna skóla. Hin hraðstefnumótin hafa verið á menntabúðum #eymennt og á #Utís2017.

Hópurinn á föstudaginn var ekki stór, 20 manns en það sem gerðist á hraðstefnumótinu sýndi mér aftur að hraðstefnumót er einföld og öflug leið til að virkja þátttakendur og vekja þá til að miðla því sem þeir hafa gert og hefur reynst þeim vel. Á föstudaginn varð t.d. að gefa a.m.k. 20 mínútur í dagskránni til að gefa fundarmönnum færi á að klára að ræða málin. Hjá mjög mörgum hafði kviknað hugmynd sem þurfti annað hvort að miðla eða ræða. Það sýndi mér að hraðstefnumót er fyrirtaks aðferð til að kveikja virkni þátttakenda og miðlun reynslu þeirra á milli.

Halda áfram að lesa