Um Ingileif

Starfa sem skólastjóri Þelamerkurskóla í Hörgársveit og hef ánægju af því að skrá samantektir og hugleiðingar um skólastarf, matarstúss og aðra iðju.

Hugmyndasprengjan á Snæfellsnesinu I

IMG_7373

Þátttakendur á Makerý gerðu orðaský með því að skrifa orð sem lýstu helginni. Á því er ljóst að helgin var bæði fróðleg og skemmtileg.

Um síðustu helgi var ég svo lánsöm að fá að vera þátttakandi í viðburðinum Makery á Snæfellsnesi. Viðburðurinn byggði á kynningu á Makery hugmyndafræðinni. Kynningin samanstóð af skólaheimsóknum, fyrirlestrum, verkefnum og vinnusmiðjum. Hún stóð yfir frá föstudegsmorgni til hádegis á sunnudegi. Að kynningunni stóðu konur sem kenna sig við Vexahópinn. Þær eru:

  • Anna María Þorkelsdóttir, Kennsluráðgjafi Hörðuvallaskóla
  • Bjarndís Fjóla Jónsdóttir, UT kennslufulltrúi Skrifstofu fræðslu- og frístundaþjónustu Hafnarfjarðar
  • Erla Stefáns, verkefnastjóri Mixtúru margmiðlunarvers Reykjavíkurborgar
  • Hildur Rudolfsdóttir, UT kennsluráðgjafi Garðaskóla Garðabæ
  • Hugrún Elísdóttir, UT verkefnastjóri Grunnskóla Snæfellsbæjar
  • Rósa Harðardóttir, skólasafnskennari og UT Verkefnastjóri Selásskóla
  • Þorbjörg Þorsteinsdóttir, verkefnastjóri Skóla- og frístundasviði Reykjavíkurborgar

Halda áfram að lesa

Google í skráningu og dreifingu á hekli

IMG_6746

Ég hafði lofað saumaklúbbssystrum mínum að skrá niður hvernig ég heklaði grænmetis- og ávaxtapoka til að taka með í innkaupin svo ég geti fækkað plastpokum í notkun á heimilinu.

 

Þegar ég var að byrja á skráningunni fannst mér upplagt að gera það með Google verkfærunum svo að auðvelt væri að dreifa henni. Í miðju kafi ákvað ég að nýta þessa skráningu til að læra eitthvað meira á Google verkfærin en það sem ég þegar kann svo að ég gerði eftirfarandi:

  • Í stað hefðbundins Google Docs skjals notaði ég sniðmát úr Google Docs sem heitir fréttabréf (Newsletter Lively). Það er falleg uppsetning á fréttabréfi sem auðvelt er að fylla í með eigin texta og myndum. Kosturinn við þetta er að uppsetningin verður ekki formleg og „ferköntuð“ eins og ritgerð, hún er falleg og það var fljótlegt fyrir mig að setja inn eigin texta og myndir í stað þess að nota tímann til að finna út úr því hvernig ég vildi að þetta liti út. Með því að birta skráninguna í Google docs skjal er nýjasta útgáfa skjalsins alltaf aðgengileg í stað þess að þurfa að skipta út pdf-skjali ef eitthvað breytist eða þarf að leiðrétta.
  • Þegar ég hafði lokið við skráninguna þá valdi ég að deila henni með því að birta hana á vefnum í stað þess að dreifa hlekk á hefðbundinn hátt. Með þessu móti mun skjalið líta út eins og vefsíða þegar smellt er á hlekkinn sem dreift verður. Á sínum tíma lærði ég þetta trix með myndbandi á You Tube eins og því sem er hérna fyrir neðan.

Halda áfram að lesa

Heklaðir grænmetis- og ávaxtapokar

IMG_6746

Á ferðalögum, úti á palli, við sjónvarpið eða hvar sem er, þar sem ég get unnið handavinnu sem krefst ekki fullrar athygli finnst mér gaman að hekla. Það nýjasta eru pokar sem hægt er að taka með sér í búðina og setja ávextina eða grænmetið í en auðvitað ekki fyrr en búið er að vigta innkaupin svo við greiðum ekki fyrir vigtina á pokunum í hvert sinn sem við förum í búðina.

Ég sá þessa poka hjá frænku minni og vinkonur mínar hafa svo séð þá og langað að hekla aðra eins poka. Eftir bestu getu hef ég skráð hvernig ég hef útfært þessa hugmynd. Ef þú vilt fá aðgang að þeirri skráningu hafðu þá samband við mig til að fá lykilorð inn á skráninguna.

Rabbabarinn út um allt

img_6694Árlega fæ ég, eins og aðrir, meiri uppskeru af rabbabara en ég get nýtt mér. Í fyrrasumar prófaði ég tvisvar sinnum að setja hann í snyrtileg 1 kg. knippi og bjóða þau sundgestum í Jónasarlaug á Þelamörk. Á síðasta mánudag gerði ég þetta aftur. Í öll skiptin hefur rabbabarinn gengið út og vonandi komið öðrum að góðum notum í stað þess að flæða um grænmetisbeðið hjá mér eða þorna upp í frystikistunni.

Í ár fékk ég góða aðstoð frá vinnukonum sem voru í heimsókn í sveitinni. Þær undu sér vel úti við það að skera blöðkuna af rabbabaranum og skera stönglana í tvennt ef þeir voru of stórir.

Gengið um Strandir

IMG_1912.JPG

Dagana 1.-5. júlí gengum við Halldór með góðum hópi um Strandir. Við hófum gönguna með því að sigla frá Ísafirði í Hrafnfjörð. Þaðan gengum við til Reykjarfjarðar um Skorarheiði í Furufjörð og þaðan um Svartaskarð til Reykjarfjarðar. Við gistum tvær nætur í Reykjarfirði og gengum svo í Ófeigsfjörð með tveimur gistingum á leiðinni. Aðra nóttina tjölduðum við í Meyjarseli í Bjarnarfirði og hina nóttina í Engjanesi við Eyvindarfjörð.

Það er fátt sem að mínu mati hleður batteríin jafn hratt og gönguferð á Ströndum.

Hérna er hlekkur á myndirnar sem við tókum í ferðinni.

 

Gerum gott betra

Úr kynnisferðinni til De Wijnberg

Ég skrifaði grein sem birtist í Skólaþráðum tímariti Samtaka áhugafólks um skólaþróun.

Greinin er um það hvernig skólaheimsókn varð að kynnisferð og síðan að Sprotasjóðsverkefninu Gerum gott betra.

Greinina er hægt að lesa hérna.